Batareya kalibrasiyası: doğrudanmı işə yarayır?

«Batareyanı sıfıra qədər boşaldıb 100 %-ə doldurun» — bu məsləhət hər yerdə təkrarlanır. Bəs o, doğrudan batareyanı bərpa edirmi? Qısa cavab: tutumu bərpa etmir, göstəricini düzəldir. Fərqi anlamaq vacibdir.

Kalibrasiya nə edir və nə etmir

Noutbuk batareyasının içində kiçik idarəetmə lövhəsi (BMS) var. O, gərginliyə və keçən cərəyana baxaraq «neçə faiz qalıb» sualını hesablayır. Zamanla bu hesablama real vəziyyətdən uzaqlaşır.

• Kalibrasiya edir: lövhənin yuxarı və aşağı sərhədləri yenidən öyrənməsini təmin edir. Nəticədə faiz göstəricisi reallığa uyğunlaşır.
• Kalibrasiya etmir: kimyəvi köhnəlməni geri qaytarmır. İtirilmiş tutum qayıtmır.

Kalibrasiya nə vaxt lazımdır

• Faiz göstəricisi «tullanır» (60 %-dən 20 %-ə düşür).
• Cihaz 30-40 % göstərəndə sönür.
• Batareya 100 %-ə çatmır və ya 95 %-də dayanır (bu, bəzən qəsdən qoyulmuş həddir — aşağıya baxın).
• Uzun müddət (aylarla) yalnız rozetkada işlədilib.

Sönmə problemi davam edirsə, digər səbəbləri də kəsin: noutbuk öz-özünə sönür.

Kalibrasiya necə edilir

1. Batareyanı adapterlə 100 %-ə qədər doldurun və daha 2 saat qoşulu saxlayın.
2. Enerji parametrlərində yuxu və hibernasiya rejimlərini müvəqqəti söndürün, kritik həddi 5 %-ə endirin.
3. Adapteri çıxarın və cihazı öz-özünə sönənə qədər işlədin (film oynatmaq işi asanlaşdırır).
4. Söndükdən sonra 3-5 saat toxunmayın — daxili gərginlik sabitləşsin.
5. Kəsintisiz olaraq yenidən 100 %-ə doldurun; bu müddətdə cihazı açmayın.
6. Enerji parametrlərini əvvəlki halına qaytarın.

İstehsalçı alətləri

Bir çox biznes noutbukda kalibrasiya BIOS-un içindədir və daha dəqiq işləyir:

• Dell: BIOS diaqnostikasında batareya bölməsi; həmçinin Dell Power Manager proqramı.
• Lenovo: Vantage proqramında «Battery Gauge Reset».
• HP: BIOS-da (F2) Component Tests → Power → Battery.

Belə alət varsa, əl ilə kalibrasiyaya ehtiyac qalmır.

Diqqət: şarj həddi funksiyası

Biznes noutbuklarda batareyanı qorumaq üçün şarjı 60-80 %-də dayandıran rejim olur (Dell-də «Primarily AC Use», Lenovo-da «Conservation Mode»). Cihaz 100 %-ə çatmırsa, əvvəlcə bunun aktiv olub-olmadığını yoxlayın — bu, nasazlıq deyil, faydalı funksiyadır.

Kalibrasiyadan sonra nəticəni ölçün

Əmr sətrində powercfg /batteryreport yazın və yaranan faylda Design Capacity ilə Full Charge Capacity sətirlərini tutuşdurun. Kalibrasiyadan əvvəl və sonra ölçsəniz, real fərqi görəcəksiniz. Üsulların hamısı: batareya sağlamlığını yoxlamağın 3 üsulu.

Batareyanın ömrünü uzadan real vərdişlər

• Şarj səviyyəsini əsasən 20-80 % aralığında saxlayın.
• Cihazı isti maşında və ya günəş altında qoymayın — istilik köhnəlmənin əsas sürətləndiricisidir.
• Uzun müddət istifadə etməyəcəksinizsə, 50 % şarjla, sərin yerdə saxlayın.
• Ağır yükdə (render, oyun) mümkünsə rozetkada işləyin — dərin dövrlər azalır.

Boşalma sürətinin digər səbəbləri: batareya tez boşalır.

Tez-tez verilən suallar

• Noutbuklar
• Batareya tez boşalır
• Adapter necə seçilir
• Adapterlər